台灣組合S.H.E當中，曾同女性友人傳過緋聞嘅Hebe，最近有咗新對象，日前佢俾台灣報章影到拍拖相，佢喺一間意大利餐廳，同大佢十七歲、《求婚事務所》嘅導演鈕承澤共晉三小時浪漫晚餐，由夜晚七點幾食到十點幾，佢哋重點白酒碰杯對飲。
據餐廳目擊嘅客人話佢哋當晚食飯嘅氣氛，好似一對啱啱拍拖嘅情侶般甜蜜同尷尬，而男方重送女方一份小禮物，係一張DVD，並附有一張卡片，而Hebe就好怕醜咁問：「我可以現在看嗎？」充滿小女孩嘅嬌嗔，而據男方嘅電影圈友人都爆料話佢最近似談戀愛，恍如一個小男生初戀一樣。
曾合作拍劇
Hebe同鈕承澤兩人食完飯後，未有即刻返屋企，反而就跳上男方架黑色MiniCooper返回Hebe住所樓下，熄火停喺門口，兩人隨即展開近一小時嘅廝磨纏綿後，一頭凌亂頭髮嘅Hebe先落車返屋企。而話說佢兩個喺三年前認識，當時Hebe拍男方執導嘅《求婚事務所》，有一場難演嘅喊戲佢一take搞掂，男方即時當眾抱住佢錫佢額頭；之後又喺宣傳時話「我要當她最愛的男人」，相信愛苗已在當時悄悄滋長。
