李彩華（阿Rain）和陳小春因為合作新片《打雀英雄傳》，成為好友，日前二人相約到海洋公園嬉戲，小春坐上迷你火車時，更風騷笑言阿Rain是他女朋友，阿Rain亦大讚小春風趣幽默又成熟。
李彩華和陳小春最近在新片《打雀英雄傳》中扮演情侶，二人日前更相約到海洋公園耍樂，重拾童真。
轉攻兒童王國
阿Rain表示平時都有到海洋公園出席活動，但每次都行色匆匆，她說：「我一直覺得呢度係媾女勝地，記得好多年前，我仲讀緊中學，有男同學約我嚟海洋公園玩，我哋玩機動遊戲玩得好開心。」
阿Rain指當時那名男同學，可能希望她玩到驚時會捉實他，誰知大膽的阿Rain不但不怕還異常投入，她說：「佢真係約錯我，應該約我去睇鬼片，我反而有機會驚到縮埋一嚿。」
小春今次帶阿Rain到來拍拖，卻因為不喜歡玩刺激的機動遊戲，轉而到兒童王國嬉戲。看見有迷你火車，小春即說：「好浪漫啊！」更帶同阿Rain一起乘坐，看見一大班圍在欄邊的旅客，他又風騷的開玩笑說：「呢個係我女朋友。」看到摩天輪、旋轉木馬和迷你跳樓機，他們又興奮的鬧着去玩。
盛讚風趣幽默
問到阿Rain覺得小春為人怎樣？她說：「佢同以前相比，份人成熟咗，識得為人設想，冇咁寸，講嘢又風趣幽默。」雖然小春符合阿Rain的擇偶條件，可是他卻不敢追求，小春說：「咁佢身邊有個緋聞人物（指蕭定一），我就無謂加入。」
場地：海洋公園
化妝：OmixB（李彩華）
髮型：DanielbyHipHairCulture（李彩華）
採訪：比華利
攝影：林德雄
