李安攞奧斯卡，係人都話好嘢，個個都斷背前斷背後。李安話根本冇斷背山，重好嘢，即係話見唔到先至正，大家都可以有自己美麗嘅想像。大家不如去大嶼山睇吓有邊座山斷咗背。
有人話呢套係同志片，其實唔使咁label套片，我理得你套係中國片定係日本片，觀眾永遠只會話套戲拍得好定拍得渣，好睇定唔好睇。英文報用sweetandsour嚟形容李安攞獎又幾貼切，真係又甜又酸。攞唔到最佳電影，我哋都sour啦。
講開攞獎，下個月又到一年一度嘅香港舞台劇頒獎典禮，到時一樣會有人甜有人酸。呢個頒獎禮都搞咗好多年，發起嘅係香港戲劇協會，以往一齊幫手搞嘅有香港電台同藝展局。不過今年聽聞查實劇協班友仔（其實係義工）呢排都好忙。上星期劇壇教父級人馬麥秋七十大壽請飲，講咗今個月十四十五日，劇協會聯同大中華文化全球協會喺理大綜藝館搞一個「百年優孟見秋成」嘅晚會，為乜？就係要籌錢搞華文戲劇節，慶祝中國話劇一百歲生日。到時中港台澳星都會有團體嚟香港。
都幾大陣仗。大家幫吓劇協手買張飛好唔好？中國話劇一百歲生日喎！好sweet啫。
觀火
傳真︰2623-9278
電郵︰[email protected]