大市急跌兩日，投資氣氛當堂差咗好多，原本小初好多老友都諗住去抽新股南京金鷹（3308），博係百盛集團（3368）翻版，但大市近日跌得咁重，成班老友都話要睇定啲。
其實又唔可以怪佢哋騰雞，皆因早排炒上的幾隻熱門新股，例如雅居樂（3383）昨日急跌5％，收4.20元，廈門港務（3378）受兒童基金減持影響，更大跌9.6％，收1.79元，就連百盛都跌2.27％，收19.35元。呢類半新股回得咁急，自然打窒散戶認講新股嘅意欲。
另外，一直受油價影響的航空股，上星期都升埋，中航興業（1110）曾急升至1.83元，但大摩隨即發表報告，話股價到位可以沽得，隻股即刻回軟，昨日再跌3.37％，收1.72元。
經紀黃話，中航興業將在3月24日公布全年業績，但因為持有的港龍同澳門航空業績唔理想，所以證券界一早預期中航興業業績下降。
中航興業股價早排炒上，聽講係因為重組一事可能舊事重提。
慕容小初