周一嶽呢排周身蟻，啲禽流雞未煩完，又要為殮房被人領錯遺體燒錯屍道歉，真係倒楣。八方覺得，要怪都要怪佢個局實在太多瓣數，由BB仔出世到入土為安都同佢有關，真係郁吓都關佢事。
唔知係咪有感而發，立法會噚日辯論醫護改革同醫療融資，嶽哥答辯時都話要向前港英高官黃錢其濂學習寫作，唔知係咪準備轉行寫小說，唔想再做官。
黃錢其濂都算係周一嶽嘅上上上手，喺港英年代都做過衞生福利司。嶽哥話，醫療改革呢個問題，由黃錢其濂時已經開始傾，𠵱家佢阿姐退休去咗澳洲移民，仲轉行去咗寫小說，嶽哥自嘲文采冇黃錢其濂咁好，唔識得寫小說，咁只好留喺政府度繼續做官啦！
其實周局長唔使太悲觀，經過呢幾年，佢一定夠晒題材寫書，文采可以練出嘅啫。
傳真︰2623-9278
電郵︰[email protected]