三八婦女節，女人大過天，噚日婦女事務委員會搞酒會，唐媽媽盛裝赴會，為女性講句公道話。不過，佢唔係為香港女人講，反而成為沙地阿拉伯女性嘅代言人，事關佢見到沙地個公主PrincessLoulwahAl-Faisal出入都要包住個頭，就戥人哋唔抵，覺得佢哋成日要蒙住面，婚姻又唔可以自己作主，都好慘喎。估唔到唐媽媽視野咁闊，連中東國家女性狀況都關心。
講起女性權益，不得不提近日講得㷫合合嘅月事假。噚日有人問起蔡菜子支唔支持，佢就話唔反對，但同時反問記者，呢樣嘢喺我呢個年紀實在太敏感，但以過來人經驗話，女人唔方便嘅日子，對佢嚟講真係neverfeelanything，生活一切如常，真係坦白得可愛。
路過嘅肥仔明都話支持月事假，仲話支持要放兩日，對女人真係體貼入微。相反肥馬局長就無咁開放喇，一問到佢支唔支持月事假，就以「我都唔係專家」為由耍手擰頭，睇嚟都要向肥仔明學吓開放言論喎。
傳真︰2623-9278
電郵︰[email protected]