恒指昨日最低嗰陣，得番15348，較前市又散254點，埋單指數，只係唔見109點，得力於中移動（941）與滙控（005）低位反彈。兩隻重磅股，埋單價雖然仍分別下跌0.40元與0.20元，但由最低位計，已總共將恒指拉番高99點。
前日開市，擺明有大孖沙明刀明槍造淡，但跌幾百點後，有錢人家亦趁低上車。滙控外圍造好，嚟到港市又俾人鋤低。滙控張成績表靚，滙控股價最終升番，帶番好氣氛，淡幫大孖沙其計唔易得逞，淡倉有可能俾人挾到爆。
滙控C輪2228：昨日推介嘅滙控C輪3400，係第2隻熱門滙控C輪（最熱嘅係9607），成架過山車咁，最高40仙，最低30仙，收37.5仙，跌1格。
滙控睇好，搏殺格炒滙控C輪，揀3400。中度搏殺，可敲2228。2228亦係熱門貨，收54仙，跌2仙，7月初夠鐘，冇溢價，槓桿率24.5倍（有效16.1倍），引伸波幅12.3%，計埋除息因素，都係非常炒得過。
中銀C輪9068：中銀（2388）收15.05元，跌0.25元，落到15元邊邊，估計守得住。
趁低位兜隻熱門中銀C輪9068，6月尾到期，輪價59仙，溢價2.8%，槓桿率25.5倍（有效12.8倍），引伸波幅19.4%。
章盛