摩笛又起，今次唱淡中資類股份，睇嚟都要一啲時間消化。不過要讚吓敝報嘅姊妹刊物壹仔，佢哋上個禮拜大字封面：「H股︰升勢未盡，隨時爆煲」，結果真係好快應驗，都咪話唔靈。
呢排香港股市陰霾密布，除咗H股之外，仲有N息嘅因素。N者，Nippon也。話說日本央行今日會宣布結束五年來行之有效嘅超寬鬆政策，唯一變數就係究竟會唔會加息。H股N息，直情好似股市流感，至於會唔會演變成「股市傳股市」呢？提醒投資者一句︰小心駛得萬年船。
日本央行究竟加唔加息最大考慮，係唔知會否就此扼殺咗尚在萌芽階段嘅經濟復蘇。上次日本加息係2000年6月，結果跟住就係長達五年嘅零息政策，可惜經濟都係死氣沉沉。近來剛剛見小陽春，究竟加唔加息，日本經濟官員真係十五十六。不過利世民覺得，日本嘅問題根本唔係貨幣政策，呢次復蘇亦唔關「超」寬鬆貨幣政策，其實一切都要多得小泉嘅改革！
旁觀者可能以為日本產品好有創意，就等於日本企業好有競爭力，不過呢個只係現實嘅一半。日本嘅強項，係對外出口經濟，至於本土經濟例如地產金融，不但非常老土死板，又論資排輩講人情關係。美國自從八十年代經濟開始轉型，加上亞洲小龍成功進入高增值經濟，此起彼落之下令到日本連出口業都節節敗退，國內本土經濟又追唔上世界性步伐，結果一個衰退就衰足十五年。
日本經濟封閉缺乏競爭，要到小泉上台先有啲改變。其他唔使講，睇佢破格用人，甚至連活力門總裁後生仔堀江貴文都夠膽用，雖然最終都被敵對政客打落嚟，仲要借佢製造醜聞打擊小泉（就好似左派借攻細良擊蔭權）。
不過堀江都算得係日本呢一代突圍而出嘅代表人物，只要呢類年輕尖子繼續出現，就反映日本慢慢走出以往嗰種老土死板思想，見曙光嘅日子還會遠嗎？只要日本開放改革繼續，就算日央行加息都冇有怕。
利世民花咁多篇幅講日本，因為香港自從回歸之後亦有「日本病」嘅表現，包括抗拒競爭、缺乏創意、利益輸送……但願香港唔會走日本以前嗰條錯路，阿門！
利世民