與一班老前輩食午飯，單尾係柴魚花生粥，比較年青嘅賓架G問：「食柴魚花生粥食得多，但係我咁大都未見過柴魚，未食過清蒸柴魚，柴魚究竟係乜東東？」呢啲問題，看似普通，但要搵七十歲以上嘅退休賓架答。賓架L立即講：「柴魚冇用來蒸嘅，一定係曬到乾，拆骨，專用嚟煲粥，清蒸就唔好食。」賓架G仍然問：「究竟係乜魚呀？就叫做柴魚？」賓架R答：「日本叫做『堅魚』，曬乾之後先至食。」講來講去，原來大家都未親眼見過柴魚，下次見到蔡瀾，問吓佢先，或者讀者知道，請賜教。
講起食物，以前香港街頭人少，唐樓得四層高，街上小販到咗夜晚就會沿街叫賣，賣欖嘅，可以將包欖一擲，就擲上四樓，穿窗而入，叫做「飛機欖」，小販嗰份眼界與臂力，實在冇得彈。街上亦有好多粥與甜品叫賣，一路行，一路嗌，唔知點解，賣粟米嘅硬係跟住賣粥嘅。賓架G話：「以前我住旺角，聽到就好笑，因為一位小販嗌完花生粥，第二位就嗌包粟，於是我哋聽到——花生粥包粟，笑到碌地。」賓架T加注解：「粟米叫做包粟。有一樣更絕，一啲小販慣咗口，沿途大嗌，花生『魷魚』地豆粥，有『茨實豬肉粥』，我當年係細路，以為個小販有兩款粥賣，落足料，有花生、魷魚、地豆、茨實、豬肉，好正啫。點知啲大人話：搵你笨㗎咋，要聽多幾次先至聽得清楚，於是我好留神，晚晚聽，又走落街買粥，最後恍然大悟，原來小販係嗌：花生『猶如』地豆粥，花生即地豆；『有茨實』豬肉粥實則係『有××豬肉』，廣東粗口令人噴飯。講來講去，小販只係賣花生粥，別無其他！」
筆者懷舊，古仔聽出耳油，大家笑聲震屋瓦，實在對健康有益，呢班昔日銀行董事長、總經理、執行董事收埋好多銀行商界掌故喺肚裏面，譬如B哥就快慶祝八十歲生辰，佢喺一九四六年入銀行，真係佢講故事，我要聽。