花𡃁Can：擸起頭髮做箍Man

花𡃁Can：擸起頭髮做箍Man

女仔要變髮就真係法寶多多，絲帶bra帶戴上頭有乜未見過，但要數男仔用的accessory，最多花臣可以搞嘅，就非頭箍莫屬。髮型師Meegan話，男仔𠵱家都仲係齋靠gel同髮泥擸頭真係睇到厭，學吓用頭箍先好玩，用法簡單又trendy。頭箍唔一定係軟headband先啱男仔，硬膠頭箍一樣可以戴得入型入格。
記者︰劉昱蘭
攝影︰陳盛臣
Model︰Max、Quinn（HongKongGenesis）、Tony　HairandMakeup︰Meegan@Maevon

中長髮有時代感

Mediumlength最難打理，頭髮長咗啲就好難gel得起，呢個時候頭箍就幫到手，戴上頭再襯一身潮服，就充滿青春朝氣。

Before

■Edison闊衫闊褲加headband潮到爆，但一定要額高面長。

Step

1.要改變又長又厚的頭髮，最好先用電夾夾直頭髮，睇落輕身啲，頭髮又唔會曲。

2.的水夠長，可以用髮泥將佢gel出嚟，玩吓層次。

SpecialTips

髮泥唔好搽落髮根，否則會令髮型感覺重咗。

膠箍鬈髮smartcasual

如果頭髮夠長，除咗headband，仲可以多一個選擇用膠頭箍，將本來遮住塊面的頭髮箍起，精神又整齊。好多明星名人都有戴膠頭箍，日本男星窪塚洋介就戴得有型有款。

■窪塚呢個頭箍look再配一身筆挺西裝，又smart又sharp。

Before

■男仔戴膠頭箍都一樣充滿陽剛氣息，絕唔會乸型。

Step

1.戴上頭箍，全頭分上下兩部份，上半部可將頭髮向內電鬈，營造拱起效果，拱得多啲層次感重啲。

2.下半部髮尾就電向外鬈，一小束向外翹起。

SpecialTips

如果想頭髮再拱啲，噴spray時要由底部開始，用手指撥開分part噴至頂。

反面教材

頭髮唔夠長嘅，用頭箍會易令髮尾彈上嚟，冇造型又唔好睇。

短髮顯活力

頭髮短的男仔，日日都淨係靠gel撐起個頭好難有乜大變化，但加個頭箍就可以即刻轉到look，如果headband夠粗就更加sporty啦。

■留長髮的朗拿甸奴，一身運動look加頭箍勁man。

Before

■把頭髮全箍上額，醒目又sporty。

Step

1.戴上頭箍，將部份頭髮抽出，但不可遮蓋頭箍，然後用髮泥將頭髮gel成一小束。

2.想增加立體感，頭髮可gel向不同方向，如分向上、下、側邊三種層次。最後噴spray定型。

頭巾×頭箍變化多
變奏一

如果想戴頭箍，但又睇唔慣齋戴膠箍個樣，可以試吓用條頭巾包住全部頭髮，後面簡單打個結就ok。

變奏二

將頭巾捲成一條，纏住頭箍一併戴上頭，就明顯有crossover的效果。

小貼士

後面蝴蝶結要打孖上，收番靚啲就OK。