食韓式烤肉，當侍應捧出大碟細碟又生菜又鉸剪嗰陣，或者你都會同我一樣怯一怯，咁多架生無從入手喎？「韓雅林」經理Christine說：「香港人心急，鍾意將牛肉左反右轉，燒到黐底兼黑麻麻。」唔想暴殄天物，𠵱家教大家正宗烤牛肉方法，首先將蘑菇、洋葱等蔬菜放入烤爐，之後再放牛肉，咪猴擒手多郁塊肉，等肉汁燒到標晒出肉面先反轉另一面再燒，牛肉一熟透就夾起，用鉸剪剪成一片片，一次過食唔晒嘅話，肉應該墊喺蔬菜上面，既可防燒焦，又可讓蔬菜吸收肉汁。
咁點食呀？一塊生菜葉放一小塊牛肉，點麵豉醬，再加些少菜絲沙律及泡菜，用生菜葉包住成塊牛肉放入口，Christine又咁話：「正宗食法一啖一件，入口熱辣辣夠滋味，女仔食烤肉都無謂顧儀態，唔係食到天一半地一半就仲麻煩喇。」
韓雅林（28777797）
地址：軒尼斯道489號銅鑼灣廣場1期6樓
