近月樓市好番些少，地產代理都搏命𢱑銀，地產代理監管局就諗計，提醒佢哋要參加持續專業進修計劃，充實自己。地監局啱啱推咗四項措施出嚟，第一就係唔使佢哋一定要修最少四個非核心科目學分，方便佢哋多讀啲真係可以學以致用嘅核心科目。第二點係延長所有代理嘅首次申報時限（由該局零五年五月推出進修計劃起計），由十二個月放寬至十七個月。
第三同第四點，則係一啲精神上嘅鼓勵。今年十月申請學分嘅代理，可獲頒嘉許證書同嘉許獎章，首十名更可獲優異獎章。而個章仲可以印落卡片上，以便派片時可以show下quali。𠵱家地監局舉行獎章設計比賽，由代理去設計番㖭；賣樓都要攞章，係咪似做童軍呢。