彤叔鄭裕彤有名沙膽，連佢間新世界發展（017）一樣成為惹火尤物，舊年尾俾英國對沖基金TCI（細路仔）搞過，揸咗7%股權，彤叔立即還拖，批咗一大嚿股份出街，極速攤薄對方嘅股權，等細路仔冇得長大；TCI惟有賣股走人，彤叔係咁意畀兩粒糖就打發咗佢走，個個都話今次真係細路仔唔識新世界。
點知，噚日又有個對沖基金話自己揸咗5%新世界！呢個基金叫做AtticusCapital，基地在紐約，相信唔係善男信女。Atticus係一個現時很少人用嘅男仔名，意思係「來自雅典」。呢個「雅典人」現時管理資產超過90億美元，1995年由TimothyBarakett創立，雅典人近期曝光嘅投資包括增持歐洲交易所Euronext嘅股權到9.1%。
雅典人話，自己喺上個禮拜四買咗940萬股新世界，持股量增至5%，即係1.82億股，所以要公布，之前啲貨幾時買就唔知。不過，佢同時又揸住新世界淡倉，仲由1200萬股增至3000萬股，究竟呢個雅典人想點呢？彤叔唔該睇吓使唔使再出招？