講開家用機嘅RPG，除咗《FF》同《DQ》呢兩款係人都識嘅名作之外，《女神轉生》亦有唔少Fans熱烈追捧，貪佢有個性之餘難度亦唔低。屬分支之一嘅《惡魔召喚師》剛剛喺PS2推出續作《葛葉雷堂對超力兵團》，唔單止畫面更靚，戰鬥亦大刀闊斧改良，變成《無雙》咁走去係咁劈友，絕對適合唔鍾意「死咕咕」揀指令嘅機迷！
文：陳福榮
重新打造大正時代
相比起正宗《女神》系列嘅近未來國度、《惡魔召喚師》同《Persona》現實社會或者《DigitalDevilSaga》嗰種「Matrix撈末世」時空，呢隻《超力兵團》真係擺明玩嘢，講番召喚師喺八十幾年前日本大正時代，借惡魔力量同惡勢力周旋嘅古仔。除咗地方設計有好重懷舊感外，仲承繼以往優良傳統，玩開呢個系列嘅人會好快上手。而且所有場景都用上高質素Pre-renderCG砌成，加埋超靚戰鬥效果，令人印象更加深刻。
全動作戰鬥無時停
雖然畫面同時代設定唔同咗，但呢啲分別就遠不及戰鬥系統，事關今次佢居然用上近乎全動作戰鬥，除非㩒個Menu出嚟揀嘢，否則一切招式都係實時進行，㩒慢啲都隨時死人。一如以往佢嘅打鬥方法有斬劍同射槍兩種，就斬劍嚟講並唔係齋斬咁單調，會按照輸入不同指令衍生唔同招式，如連續斬同迴旋斬等。而最特別嘅係，只要針對敵人弱點嚟𡁻，不但會扣得「甘」，仲可以令惡魔同伴興奮指數上升，從而使出威力超勁嘅合體技！
除此以外，向惡魔「招安」亦唔似以前咁齋Talking咁悶，先打個弱點出嚟令佢暈得一陣陣，然後走埋去用封魔術係咁㩒圓形掣吸咗佢，對於唔多識日文嘅玩家確實係重大改良。
偵探查案要食腦
同以往有啲唔同，縱使主角雷堂係見習偵探，要搞掂棘手Case並不像過往求其搵人傾偈攞料、行迷宮打吓怪咁簡單。今集就將惡魔同伴嘅重要性大幅提高，好多時都要借佢哋之力嚟解謎。舉個例子，有啲人平時扮到好鬼Cool點都唔肯爆料，於是就要召喚紅蓮屬性嘅惡魔出嚟，以專用技能「發火」噴向佢度，搞到佢情緒高漲亂咁噏嘢，又或者掉番轉用銀冰屬性惡魔嘅「冷卸」將對手心情稍為降溫，換言之當發現有啲人起初問唔到料嗰陣，不妨轉換惡魔嚟搞搞佢，話唔定有意外收穫。亦因為拉惡魔入隊未必能夠指定屬性，好多時都要借助業魔殿進行惡魔合體，咁就可以整啲平時見唔到嘅勁揪惡魔，以佢哋力量幫手繼續解謎。
個人評價
玩咗咁多年《女神》，今次都可算係玩得最攰嘅一集，因為戰鬥要不停㩒掣斬嘢，呢種互動感覺咁多年嚟都未試過，認真一試難忘完全停唔到手。畫面同音響做得好正，大量Pre-renderCG場景將大正時代嘅日本倒模出嚟，唔差得過《真女神3》挑戰機能極限嘅演繹手法，至於啱Feel到震嘅懷舊曲調就更正斗。雖然以惡魔技能嚟幫手搵線索幾有新意，但玩起嚟其實都幾煩吓，尤其是一開波唔知咩招至開到Event就令人幾苦惱，需要有不斷轉同伴試嘢嘅心理準備。做得最衰一定係讀碟，出入戰鬥都Load幾耐吓，如果閣下耐性唔好就好想熄機！
金子爆料出NDS版
雖然唔少人都鍾意《惡魔召喚師》呢個分支，但由於頗為Hardcore關係，唔少人對佢耍手擰頭，結果96年PS嘅《Persona》吸納咗幾多新玩家，成為當時另一成功派系。數數手指，今年佢又正值十周年，稍前喺《超力兵團》嘅宣轉Event度，金子一馬等人爆料話《Persona》唔單止會出NDS復刻版，PS2更會喺7月推出延續篇！
PROFILE
遊戲類型：動作RPG
對應機種：PS2
遊玩人數：1人
開發商：ATLUS
售價：$428
售賣點：DreamStore（25753285）
地址：灣仔東方188商場G04、256號舖
