港股噚日期指沽盤來勢洶洶，接近中午時期指一度插至15235，其後雖見反彈，但未能扭轉跌勢，即月期指收15332，跌131點，大低水161點。
黑客話，呢兩日個市明顯有大戶清貨，暫時唔知係大戶獲利回吐，定係骨水走人。若果純粹是獲利回吐，大市跌幅應該有限，但如果係骨水走人，則可能係有啲利淡因素尚未浮現，如果真係咁，大市可能重有一輪震盪，15000亦未必保得住。
港股全日跌109點，收15493，跌市出現近412億元大成交，真係唔講得笑。中資股成為重災區，H股指數挫2.65%，收6230。
大摩出咗份報告唱淡中資股，主要因為油價難測、3G發牌情況不明朗、內地金融股現價太昂貴，叫客戶減持。其實大摩的論點並不新鮮，不過就有唔少芬佬聽佢支摩笛跟住沽，搞到中資股出現小股災。
新世界又惹狙擊疑雲
新世界（017）早前被TCI（兒童基金）增持，惹起狙擊疑雲，新世界亦急急配股畀好友抗敵，以保住周大福的控制權。噚日美國基金AtticusCapitalLP申報持有新世界5%，今次唔知是敵是友，及會否觸動市場神經呢?
噚日跌市，但新世界等地產股午市反彈得頗急，新世界收12.10元，升1.25%；新地（016）升0.19%至78.60元，恒地（012）升0.12%至41.80元。似乎外資對本港的地產股好有興趣。
i師傅話，外資可能擔心美國樓市會爆破，搵定資金避難所，咁啱本港經濟正值復蘇期，而地產又是本港重要經濟支柱之一，唔少人睇死曾蔭權在連任前，唔會大增土地供應量，而就算順利連任，亦多數繼續高地價政策，所以吸引熱錢來港炒地產股。
阿虎