代理競爭激烈，乜都要鬥一餐，鬥跑數（促成交易）、鬥業績之餘，仲要鬥埋啖氣，繼日鬥夜鬥話某某新盤成交宗數冠全行之後，終於玩到去二手豪宅，誓要贏埋對手先心息。
先講美聯，佢哋何文田區分行，一個星期內連做兩單加多利山大碼成交，金額接近三千三百萬，其中一單更加係因為收到風話對手都帶緊客睇層樓，佢哋個客戶經理黃慧劍不惜凌晨一點幾，跑去送定金支票畀業主，夜麻麻一個女仔走去鬼死咁靜嘅加多利山，業主非常欣賞佢，即時收票應允交易。而身為區頭嘅陳泰圖，有個咁勇咁搏嘅女下屬，當然與有榮焉啦。好喇，到中原。戰場係港島區嘅跑馬地禮頓山，今個月新官上任三把火嘅跑馬地區阿頭吳詠慈，月頭嗰五日，已經帶領同事做成咗四單禮頓山成交，實際金額唔知，只知係有過千萬，總之就好肥仔。
贏就要贏到盡，連個氣勢都要吹到有幾勁得咁勁。市場爭勝之道也。