民政事務局常任秘書長林鄭月娥（左三）噚日都係首日返新工，八方聽聞，林太獨個兒由英返港，留低兩個仔同老公係倫敦，林太好人緣，第一日返工，就收到好多花，仲同十八區DO同署長級以上官員以及眾人媽打李麗娟見咗面，了解工作，又打長途電話同在京開兩會嘅肥平上司報到，之後仲去埋三八婦女節酒會，真係勤力。
被視為打得嘅林太話，做呢個位，同駐倫敦時分別不大，嗰時都成日要見人，就算呢個位有幾多應酬，都唔會唔慣。佢咁敬業樂業，八方祝佢飲飲食食之餘，繼續保持苗條身形就掂晒。
孔慶初攝
傳真︰2623-9278
電郵︰[email protected]