太古同國泰航空新任主席白紀圖（ChristopherPratt）噚日正式出場，首次主持國泰業績記者會。嘩，佢同前主席唐寶麟真係差天共地，勁和藹可親，全程笑笑口，就算俾華華兜口兜面問佢喺太古集團做咗28年，冇乜接觸過航空業務，點樣主持大局？佢唔單止冇扁嘴，仲答得好得體㖭。
佢承認自己冇乜航空業背景，但相信可以做得好出色，時間會證明一切喎。其實，上任個多月嘅白主席，噚日嘅表現極好，好多關於國泰派息、燃油成本同內地發展等問題，佢嘅回應都言之有物，好有洋行大班風範。
最勁嘅係白主席已經好醒咁，識得避開關於太古嘅問題，話要留番今日太古業績記者會先講。呢個直情係太古及國泰主席嘅傳統技巧。不過，講明先，華華冇話前主席唐寶麟唔好，只係兩個主席嘅個性南轅北轍，唐寶麟鍾意做，唔鍾意講，所以先會做咗一年大班就話悶而拜拜。
程志遠攝