昨日個市咁玩法，大概冇乜人會估中。33隻恒指股，只有滙控（005）叫做有進賬。37隻H指股，冇隻升，最叻係寧滬高速（177）冇跌到。29隻紅指股，又係冇隻升，最叻係越通（1052）、中信資源（1205）及中旅（308）冇跌到。
滙控盤數靚，喺英美先升，嚟到本港，見過134.20元（升1.90元）後回到132.60元收市，微升0.30元。最低之時跌過0.10元。昨日險象環生嘅情況，估計唔會維持好耐，定啲嚟，有平C輪，可博反彈。
滙控C輪3400：滙控睇好，搏殺格短炒滙控C輪，向3400埋手。隻輪下月初夠鐘，輪價38仙，負溢價1.4%，槓桿率34.9倍（有效29.5倍），引伸波幅10%。計埋正股除息因素，隻輪實際溢價0.4%，即係到期嗰陣正股較現價升0.53元，炒隻輪就唔使輸錢。
想中度搏殺，揀2228。想冇咁搏殺，揀2176。
東亞C輪4805：東亞（023）跌0.75元（2.8%），東亞C輪4805跌7.9仙（29%）。酌量博4805，下月初到期，輪價19.6仙，負溢價3.3%，槓桿率13.2倍（有效12.4倍），引伸波幅19.2%。正股派股息相等於股價3.6%，隻輪實際有輕微溢價，唔算貴。
章盛