最近隻隻新股上市，大部份都有番咁上下升幅，帶挈啲散戶賺唔少。見到啲咁墟冚嘅上市勢頭，我啲新界街坊，一邊㩒機睇股價，一邊窒我：「阿利，你早退休幾年喇。如果做埋呢一浸先退休，分分鐘掘多一千幾百個先收山，係咪好唔抵呢？」
對住呢班師奶街坊，唔知好嬲定好笑。佢哋個個以為會計師幫公司上市，實賺到豬頭咁。見到我着得咁寒酸，都以為我收得咁密，咁多身家都咁孤寒自己。實情佢哋都唔知會計呢行係乜嘢世界。
幫公司做上市，成隊團隊包括投行、律師、會計師，最叠馬一定係會計師這一條team。遇着大型國企例如建行又或者中乜物，閒閒哋幾百人四散全國各地。Headoffice做「con梳」，淨係打電話出電郵都做到氣咳。如是者幾百人坐低搞一年半載，條數你都識計。到搞得到盤似樣嘅數可以畀大家開會傾偈用，都已經使咗幾千萬timecost。
仲有，之後又要加又要改，做到咁上下，啲棘手嘢終於浮面。年終都不知有幾多因為一啲生死攸關冇辦法解決嘅死結，令成個上市計劃胎死腹中。到時啲timecost惟有writeoff。
都未計嗰啲萬事俱備，到臨門一腳因市況「撻Q」，之後再搞又要做多盤Stubperiod，又要人手調配。總之，到上市成功，收嗰一千幾百，七除八扣，真正賺錢嘅絕無僅有，淨係靠以後做Audit賺番些少，蝕頭賺尾。
所以話，對住班師奶窒我，惟有笑一笑，然後答：「都係早啲退休同你打牌爽啲！」