打《SEED》同《ZGUNDAM》已開始膩到嘔！萬眾期待《MOBILESUITGUNDAMCLMAXU.C.》終於在PS2上登場；對BANDAI出呢類3D格鬥真係冇乜信心，不過首次跟足宇宙世紀，由RX-78至CROSSBONE將歷代GUNDAM悉數登場，加埋照足原著故事嘅遊戲劇情，實在好難叫人唔買；測試後感，整體系統算唔錯，得意在以立體CG重演每代GUNDAM經典最終決戰場面，嗰種興奮、感動，簡直令人毛管直竪！
記者：朱崇德
遊戲中登場的高達，可以話同類遊戲之冠！跟足宇宙世紀各個年期，包括有元祖高達、08小隊Ez-8、口袋戰爭NT-1、星塵回憶GP01/02/03、Z高達、ZZ高達、馬沙之反擊γGUNDAM、F91及CROSSBONE等！機體設定超精細，唔好話原著動畫及唔上，就連𠵱家打緊嘅《Z高達》都有被比下去之感！還有跟足原著的「CHRONICLEMODE」，過癮處是每代主角揸番自己愛機，再重演經典戰役，好似RX-78對自護、Ez-8惡戰老虎改、GP01/02捨命對決、MKII對暴走重高達、Z撞爆The-O等；每完成一個年代，可得到以CG重新繪畫的結局、敵軍隱藏人物、戰機及遊戲故事等，真係有種「吸」住人打的感覺！
隱藏EX模式取得方法
同類遊戲唔少得嘅，當然還有隱藏模式──EXTRAMODE！取得方法眾說紛紜，筆者測試時發現，在CHRONICLEMODE中只要打下所有主角機體的故事內容，就會在最尾的年份出現「U.C.????」，在裏面一氣過打贏了歷代的高達，遊戲主Menu的「???」就會顯示出EXTRAMODE；此模式可以用超黐線形容，1On1、連打幾隻（每打一隻加少少血），而且所有敵機AI超高，可以話集屈槍及閃避王之大成，不過畀個貼士大家，玩家可多儲槍然後躲在建築物掩護之後，因Level3的槍擊是有穿牆的效果，都可謂相當屈吓！
育成機師曉生仔
為咗增強遊戲可玩性，都好多大Game一樣加入了「育成模式」──PROGRESSMODE；玩家在每場戰事中可取得「增益點數」，然後選擇性地提升射擊、閃避、裝甲等各方面能力。由於遊戲橫跨了宇宙世紀數十個年頭，可能為了遊戲的合理性，所以亦使用了「老將」退役及「後代」轉承的機制，所以玩家的後代可以完全繼承「老將」的能力值。
遊戲唔少得嘅，當然還有最富挑戰性的「對戰模式」，不過遊戲版圖、機師及戰機，全部都要靠正規遊戲中，以隨機抽卡的形式取得，想遊戲所有選項完全開放？相信要花一段時間。
一味Dash盞變炮灰
玩家另一擔心重點，相信就係遊戲的系統；基本操作同Capcom的Gundam系列有幾分類似，基本都係槍、劍、Booster及發動超必幾樣，不過留意敵人不論嘍囉或大佬，所有槍擊都有近似先讀的功能，一味同一方向狂Dash狂走，必定俾人打到變豬頭，建議多用Booster無意識的左右做假動作，有時甚至向後走，拉大敵方飛行武器的射角，會有意想不到的效果！
戰機的槍、劍都有儲氣效果，槍的儲氣較特別，第一行氣可增攻擊力、第二行有多目標追射，而第三行有終極殺傷力，最有代表性可算是百式，儲第三行氣竟可Call出外掛式米加粒子炮，筆者曾有一槍打到RX-78得番一滴血的經歷！不過技巧是在不被打中的情況下，盡量游近敵機先開炮，可大大增加準確度同攻擊力！
PROFILE
遊戲類型：ACT
對應機種：PS2
遊玩人數：1至2人
售價：$428
(C)BANDAICO.,LTD.2006AllRightsReserved.
鏡頭以外
一直有打開街機高達，不過《MSGCU.C.》的閃避及開槍的時間感覺，真係同街機好唔同，要好一陣子先習慣到；最驚歎的是每隻MS及MA的設定好精細，重有儲卡及360○任睇，400幾張、隨機咁出，想儲齊佢真係一個大Project！
