一如所料，滙控（005）業績雖然好好（起碼前晚在倫敦就造上136元），但番到嚟香港，最高都只係134.20元，然後一路插到落132.60元收市，只係象徵式升0.30元，成交更大增63億元。形勢擺到明，呢一兩個禮拜有十幾隻窩輪到期，發行商冇理由唔食到盡嘅，噚日成交咁大，大戶做工夫，唔會留手。
恒指險守15600大關，大跌209點，又一次好消息出貨。恒指已跌穿10日線同20日線，形勢已明顯轉壞，50日線在15522，守得住，仲有得「掹」。同芬佬傾開，佢哋話個市應該只係調整，家吓資金好充裕，人民幣未升值前，佢哋唔會大量流走，大市借勢震完倉後，又會再升過。
內地地產股全面下跌，新世界中國（917）高開低收，跌0.20元，短期若然上唔番去，則前日嘅就係假突破，大戶可能仲未收夠，唔想開車住。
07年後收益將倍增
呢兩日，農業股係大市焦點所在，噚日玖源集團（8042）同浩倫農科（1073）都曾經急升，前者收市仍升18%，而超大現代（682）亦升5%。溫總重申要投放更多資源在「三農」方面，以及全面取消農業稅，涉及的資金達4400億元人民幣，預期農業相關股份日後仍會有強勢表現。
金威集團（910）轉型植林業後，股價就突飛猛進，噚日在大跌市仍能屹立不倒，穩收0.26元。上月7日，推介金威，當時股價0.198元，話短線目標0.25元，經已超額完成，由於新業務前景好樂觀，揸中線，股價升幅可以倍計。
金威以5.6億元收購北京萬富春70%股權，在山東種植經基因改良樹種桑科構樹，由於把土壤改良，每8個月可收割一次，每一批幼苗更可供8年收割之用，而第二次長出的樹木產量，更比第一次多出一倍，即係07年之後，收益可以倍升。賣方承諾06及07年度（12月年結），每年盈利不少於2億元，以收購價計，相當PE2.8倍，非常有利。
金威近日由0.20元起步，升上0.265元後形成上升三角形，可在其破位時追進，短期量度上升目標係0.33元。
郭兆誠