黎姿、佘詩曼、林保怡等一班《金枝慾孽》演員同劇集監製戚其義，日前去咗湖南電視台宣傳，當時主持要戚其義揀一個最唔鍾意嘅藝員，佢諗都唔諗就揀黎姿，話黎姿成日NG好白癡，搞到黎姿面黑黑。
問題預先夾定
據知黎姿為咗呢件事好㷫，無綫藝員部對戚其義咁樣摑自己友一巴亦好唔滿意，所以黎姿返港後，要求無綫開澄清大會，還佢一個公道。事實上，當日黎姿本來約咗班記者喺電視廣播城傾偈，其實就係要澄清呢單嘢，但結果又臨時取消。原來，無綫管理層最終唔想件事鬧大，所以力阻黎姿搞澄清大會，話等件事丟淡之後，再幫佢做番啲嘢，黎姿先至順番條氣。
其實戚其義一早同主持夾好問乜問題，都答成咁，難怪黎姿會咁㷫，當眾俾人踩，叫人哋女仔人家點落台？難怪事後有人話白癡嗰個，其實係戚其義！