農曆新年之後，新盤市場開始熱鬧，地產代理都冇咁愁，生意陸續好轉，唔使個個月見紅。噚日牛一嘅利嘉閣執董廖偉強話，上個月公司營業額三千一百萬，比一月二千六百萬已經多咗兩成，但係重要蝕少少。
不過，今個月陸續有新盤開賣，生意應該會更好，頭六日就有一千萬，起步唔錯。而且，今個月除咗葵涌中小型住宅雍雅軒外，重有幾個豪宅盤賣，好似沙田嘉御山同西貢溱喬，估計全月營業額有五千萬，有少少盈利。
廖董重話，舊年年底樓市急速轉靜，佢哋部份分行採取臨時關閉策略。不過，近排個市道開始好轉，有啲已解凍，𠵱家全線就有一百四十間分行，員工一千六百人。集團仍然維持逐步遞增人手一百人策略，迎接旺市來臨。