黎耀祥的母親前日凌晨因患老人病在睡夢中去世，享年七十四歲。昨日祥仔到富山殮房認屍後表示，大前日才舉家拜山，想不到事隔一天竟跟母親陰陽相隔。當他憶述亡母生前對子女循循善誘，教育他們不要胡亂花費時，不禁哽咽。
無綫藝員黎耀祥的母親黃鍊桃女士因長期患高血壓、糖尿病，前日凌晨在睡夢中逝世，享年七十四歲。昨日早上祥仔在三名男子陪同下出現富山殮房，見他手持一號籌辦理認屍手續，神情哀傷。
「舒舒服服咁走」
昨日祥仔接受本報電話訪問，他語氣沉重地說：「佢噚日朝早去嘅，都病咗一段日子，食藥食咗好多年，血壓高都成二十幾三十年，但佢份人開開心心，冇乜點戒口，樣樣食啲。糖尿病都冇戒糖，佢話樣樣唔食冇乜人生樂趣，都係行呢條路㗎喇，都舒舒服服咁走。」
祥仔續說：「其實都好突然，前日我哋成家人去拜老竇，夜晚阿媽叫我返屋企食飯，但係我約咗外父，阿哥同家姐就返咗屋企。夜晚食飯時都冇嘢，到咗凌晨十二點幾，阿媽話唔舒服，阿哥就去睇佢，畀咗啲藥佢食，第二朝阿哥唔放心，再睇佢時已經走咗。其實大家都明白，最緊要走得舒服，佢都係想咁走，佢講過話唔想仔女成日去醫院，都選擇留喺屋企。」
起父骨同母合葬
問祥仔其母生前會否擔心他做演員生活不穩？祥仔說：「冇，我哋成家人感情OK，佢一向好樂觀，從來冇期望仔女要發達。」這時祥仔已忍不住哽咽起來：「佢好慳，有時換車換傢俬，佢成日話用得唔好嘥……教我哋好多嘢。」
祥仔表示母親身後事已處理得七七八八，會於下周五（十七日）在九龍殯儀館為亡母設靈，翌日大殮，遺體將送往歌連臣角土葬，他亦會將父親遺體起骨，擺放金塔中與母合葬。
採訪：朱倬誼