剛升任牛奶公司「健與美」業務董事嘅麥瑞瓊，同埋萬寧新任香港及澳門區行政總裁陳慈恩噚日同傳媒會面，講吓萬寧家陣有幾威。麥瑞瓊話，雖然舊年香港租金升幅驚人，萬寧都因為咁關咗唔少舖，但到舊年底為止，埋單計香港分店總數都多咗成10間，有224間。
陳慈恩話，其實萬寧舊年唔止開咗10家分店咁簡單，佢哋舊年總營業額同分店營業額都有增長；而佢哋個增長並唔係普通嘅增長，係喺舊年香港通脹只得1.1%，集團售賣貨品平均價格下調2.4%的情況下做到嘅，都唔係咁易！
對於租金係咁升，麥瑞瓊話，佢哋會盡量將成本控制到最低，但係有時租金呢啲嘢並唔係話控制就控制得到。不過，佢唔係咁擔心喺領匯（823）個場間分店，因為蘇慶和話過加幅只係溫和咁話喎！但華華睇證券行出嘅領匯研究報告又好似唔係咁講喎……