電影《絕世好Bra》中，古天樂及劉青雲兩位產品設計師甫踏入公司，全體女同事已神魂顛倒，現實中三位男同學雖然沒有令一眾女生瘋狂，卻得到女同學的體諒，有女同學直言，男生除了「口味」獨特外，沒有可惡之處，兩者相處絕無尷尬，「我哋都係照樣係咁，攞住個胸圍周圍走。」
勝在夠熱誠
三位男同學明顯受女同學歡迎，記者替男生拍照時，其餘女同學在課室另一端不停吶喊，提醒三人要笑得從容。同學仔Serene覺得，三人「對形狀冇乜概念」，對何謂合身也搞不清楚，而且眼光獨特，「女同學都鍾意粉紅色呀、喱士或者加絲帶咁，佢哋唔知點解會鍾意豹紋。」
另一位同學Cherie則指，很多時上課，男同學都搭不上嘴，「譬如period（月經）會影響女性荷爾蒙，令個胸脹同埋痛，佢哋都唔知我哋講緊乜。」她接着說，「同埋佢哋感受唔到個shape（形狀），點解條帶會跣，nipple（乳頭）唔舒服，心口覺得哽，我哋明，咪係咁笑，佢哋又唔知我哋笑乜囉。」課程其中一位老師、理工大學益德內衣專業學院講師葉曉雲說，課程去年招生時，有不少男性面試，三位被取錄的男同學勝在夠熱誠，「佢哋初初都會唔係好敢掂啲胸圍㗎，不過𠵱家已經唔會。」
本報記者