噚日一早起身開公仔箱睇開市，節目主持人問財經演員嘉賓即日市況預測，只見財經演員支支吾吾講︰「今日應該牛皮……」點知話口未完，現貨市場一開，恒指十五分鐘唔夠插咗二百幾點。
利世民唔怪呢位分析員。老實講，前日獅子錢莊業績大好，淨係呢隻大笨象已經可以撐起半邊天，正路個市唔升都幾難。呢位分析員話牛皮已經好保守，其實可能佢心底裏已經睇淡，只不過無信心講出口啫。
事實上，近來財經界已經有唔少高人向利世民表示，凡事小心，見勢色唔對一字記之曰︰「走！」當然有唔少朋友都有同感，覺得恒指衝唔過萬六點，都係時候回頭，更加有朋友指出利好消息已經出得七七八八，市場再無上升理由。畀多個理由大家︰噚日某份主流西報頭條話恒指見萬六，可見個市真係見頂矣！
冰島幣插水
資金新秩序第一擊
講真今次跌市並非全無先兆。話說上周有老友提水，話冰島貨幣Krona對美金大跌。冰島關香港乜事？利世民大膽講句，係世界資金重新分布嘅序幕，好戲還在後頭。
話說市場之中有一種不勞而獲嘅搵錢方法，叫做CarryTrade，簡單啲講就係響啲低息市場借錢，然後去高息市場放數。冰島息率成十二厘半，發展國家之中數一數二高，亦當然係呢啲游資收息嘅聖地之一。不過最近美國十年期國庫債券息率創2004年6月以來新高，即係意味市場預期息口會再上升，另一方面日本又放聲氣話會收緊銀根，如果加息最終變成事實，就可以解釋點解資金要從高息市場流走。Krona幣急跌，唔通代表咗資金流向已經轉向？
除此之外，𠵱家嘅息率曲線亦反映咗市場對後市存在極大不明朗因素。話說對上一次市場出現同樣嘅息率曲線係2000年3月，結果道指響2000年4月就創出有史以來，以點數計單日第二最大跌市，之後嘅熊市要一直到2003年第一季先結束。
傳統智慧話︰亂世買金！金手指孫兄大力唱好金銀，唔通後市真係好亂？
利世民