北京召開兩會，身為國家領導人級嘅政協副主席霍老同老董，當然都要北上列席會議。
心水清嘅朋友，應該見到除咗三月三日政協開幕禮嗰日之外，都無乜見過霍老蒲頭，一句挺曾言論都無講過；反而老董就成日出現，又主持埋同港區政協嘅會。霍老一向好勤力，無理由一見老董喺度，就無喇喇失蹤，所以有關佢身體不適嘅傳言就四起，話霍老有病所以唔可以露面喎。
同霍老相識嘅政界老友同八方講，霍老同普通人一樣，患上一般老人病，但唔係嚴重㗎。之不過，一個年過八十歲嘅老人家，當然係休息至上，人多嘅地方，可以唔出席就唔出席㗎喇，尤其有政協新貴老董喺度，霍老梗係閃得就閃，咪當畀老董過吓癮囉。
政界朋友仲叫八方向四方好友講句多謝關心，事關好多人都問起霍老近況，證明霍老都好得人敬重，八方在此都祝佢身體健康，快啲出嚟同港人見吓面。
爆料熱線：29290000、27860099
報料傳真：26239278
報料電郵：[email protected]