雖然話科網熱過晒氣，但網上商貿其實仲大把人玩，好似搞網上拍賣嘅ebay，喺國際上可以話係拍賣網站大哥大，但進駐香港只得兩年多啲，港區話事人黃朱寶燕Kerry（圖後排中）又上任冇耐，想響「朵」就點都要搞搞新花臣。
佢哋最近喺學界搞網上生意策劃大賽，目標係大專生，有獎金又有獎品！不過華華覺得，最着數都係eBay，事關所有參加者都要先做會員，又要鬥賣得多貨及賺得多錢，咁樣搞一搞，ebay會員人數多咗，貨嘅數量同成交量都會增加，至緊要仲係有宣傳成效，呢一着都可算係一石多鳥。
Kerry話佢本身係澳洲籍華人，嚟咗香港十幾年，個中文名都係用嚟應付傳媒，自己好少用，至於廣東話識聽八九成，講就真係有限公司；家吓專責港澳兩地業務，都要經常四圍飛，做eBay之前，佢喺旅遊網站zuji.com做管理工作。