香港又再揚威，喺第五屆亞太資訊及通訊科技比賽裏面，十五個大獎中勇奪其中六項（附表），為歷屆最多。
主辦單位香港電腦學會會長李惠光噚日喺記者會上話，今次嘅成績，可以證明香港喺資訊及通訊科技上嘅主導地位。
比賽有嚟自十一個地區共164名參賽者，香港則有16家企業參賽。十一個地區分別為香港、澳門、澳洲、汶萊、印尼、馬來西亞、巴基斯坦、新加坡、斯里蘭卡、泰國同越南。不過亞太區中實力最強嘅日本、南韓、台灣同國內都無參加。
得獎者中，醫管局嘅電子病歷影像放送系統可以幫醫生輕易取得病人病歷，有助救人，功德無量；至於地鐵嘅工務行車管理系統，就有助1200個員工，令佢哋可以每晚喺僅有嘅三個半小時內，為列車進行安全維修檢查，抵佢得獎。