本港首隻上市嘅房地產信託基金領匯房地產信託，前身係房屋署，好官僚，但𠵱家做嘢都用晒商業手法，揸咗佢嘅股東肯定開心，但蘭西收到風話原來咁令到另一批人好唔開心，其中之一就係物業管理公司。
話說領匯未接管啲商場時，房屋署已逐步將啲屋苑管理合約以招標方式外判，成為啲管理公司嘅一個收入來源。點知上市之後，領匯作風大變，唔再明碼實價咁招標，而係要求物業管理公司報價，然後再揀。
有生意，物業管理公司梗係諗計啦，佢哋即時問，報咗價，係咪等於最平嘅可以攞到合約？管理年期有幾長？但答案係同中標無關係。即係話管理公司做完一大輪，分分鐘得個桔，但係唔做又唔得，咁咪好勞氣囉。
消息人士透露，領匯今次將一百三十一個商場嘅資料畀咗管理公司做參考，黃大仙樂富商場同將軍澳尚德商場都喺名單內。呢兩個係領匯收入最多嘅商場。
除咗管理公司，另一批唔高興嘅係區議員，原來以前佢哋搞活動可以向房屋署申請免費借用場地，但領匯接手後，就要佢哋畀錢，雖然收費唔係貴，但食慣免費午餐，當然就好不滿，猛問領匯有咩準則？係咪慈善團體至有贊助？搞到領匯啲公關震過貓王。
其實使乜咁驚。喂，我係上市公司，要向股東交代，點知你借個場搞乜？當然一切按商業原則辦事，如果對個場嘅人流有利，或者你真係為咗公益，咪贊助囉！否則唔該你畀錢，唔係咁，遲早被ICAC查。不過，咁樣一嚟就有好多人唔HAPPY。
電郵地址：[email protected]
