滙豐前日宣布業績，盤數算好靚，一眾分析員跌晒眼鏡，班「醒目」股民諗住噚日股價實升，於是飛撲去搶輪，點知全部中伏，4點收市後，個個都冇表情。
講起滙豐，去年5月接任滙豐亞太主席，成為首位華人大班的Vincent鄭海泉，過去九個月可謂驛馬星動，飛遍亞太區每個角落，鄭大班話，成日做空中飛人，有苦有樂，辛苦嘅係接駁班機不順暢，樂事係見識到唔同地方文化，雖然大班本身遊歷已經好廣，但亞太區有啲國家，好似斯里蘭卡咁，都係做咗大班後先第一次去，而滙豐投資咗50億美元嘅中國內地，當然就係到得最多嘅景點。
滙豐口號乃「環球金融，地方智慧」，作為獅子行大班，Vincent話，去到邊要入鄉隨俗都難唔倒佢，好似早前喺韓國主持商務中心開幕，就着晒傳統大韓民族服裝現身，仲戴埋帽，成個「大長今」閔大人咁英偉！當地銀行開幕儀式，又興將啲錢放入個豬頭度，咁鄭大班一於有樣學樣，豬頭都冇有怕。
讀者如有任何意見或報料，歡迎發送電郵至[email protected]。