噚日提到唐寶麟（圖），話佢嫌太古兼國泰航空主席太得閒頂唔順要拜拜，佢噚日終於浦頭，心情明顯比舊年愉快。
佢離職一個月後，會過檔一間專門出租飛機同貨船嘅金融集團──AllcoFinance，擔任亞洲主席，長駐香港。
唐寶麟似乎同太古有不可分割嘅關係，事關佢間寶號，都係租用太古廣場嘅寫字樓，行出行入撞番嗰啲人，第時同國泰傾租飛機生意都非常方便，熟晒地頭吖嘛。唐寶麟自己都忍唔住話太古廣場真係好方便。
Allco大部份生意係出租貨船，出租飛機畀全球航空公司，只佔兩成幾，𠵱家租緊30架飛機，就嚟加到45架。
唐寶麟話內地航空公司近年不斷擴充機隊，發展潛力龐大，佢呢個只管十幾人嘅主席，應該要落手落腳做，有排忙。