原本大家諗住滙控（005）業績靚、派息佳，大市會造好，但噚日港股竟然掉轉頭大跌。經紀黃話自己好彩沽咗期指，仲話近排炒乜升乜，旺氣逼人，令到小初又羨慕又妒忌。
雖然藍籌、紅籌同國企大部份都跌，但阿爺話要扶持農業，農業股係咁炒上，例如超大現代（682）昨日再升5.2％，收5.05元，又係52周新高。
此外肥料股世紀陽光（8276）同埋玖源集團（8042）亦分別升4.69％及18.87％，前者收3.35元，後者收0.63元。
孔雀石綠影響已過
經紀黃話第一天然食品（1076）都諗得過。隻股主要在福建生產急凍海產食品，去年因為受到大陸鰻魚產品發現孔雀石綠事件，令股價一度低迷，但揸得最重貨嘅芬佬並未沽過，事件雨過天青，隻股亦重拾升軌。
第一天然食品上市以來，一直交到功課又有息派，往績PE5倍，預測PE亦唔慌高，可以博得過。昨日升8.2％，收0.66元。
慕容小初