今屆奧斯卡頒獎禮，好似比每一年都更緊張，睇怕都係因為李安執導嘅《斷背山》，有望締造歷史，成為第一部由華人執導嘅最佳電影。
無綫明珠台都唔執輸，前日仲借用咗教育電視嘅時段，轉播奧斯卡，可惜有家長就唔多like，張太噚日就打去港台，投訴呢個安排，認為無理由要教育電視讓路。
俾人轟，梗係要回應，負責製作教育電視嘅港台，就派出助理廣播處長張文新解畫。新哥話原定只係喺朝早嘅亞視英文台轉播奧斯卡，點知奧斯卡超時，中午十二點都未播完，結果先借用咗明珠台三十五分鐘時間轉播，強調佢哋都係以盡量唔影響教育電視播放為大原則。
張太唔鍾意咁嘅安排，但都有市民支持㗎，學馮小姐話齋，一年得嗰一次頒獎，學生透過睇奧斯卡，唔單止睇到李安點威法，更加可以學好英語，睇少一陣教育電視又有乜所謂？呢句說話，學生聽到應該最happy。
爆料熱線：29290000、27860099
報料傳真：26239278
報料電郵：[email protected]