華人置業（127）成為TCI（兒童基金）的新寵，加上大劉入市增持，股價復現強勢，由上月底的8.60元升至昨日的高位10.75元，不過高位有獲利回吐，退回至10.10元收市，升幅收窄至2.5%。
TCI在8.33元水平入股，以昨日收市價計，賬面獲利21%，唔知會唔會減持獲利呢？
TCI沽廈港賺到笑
TCI於3月初，3度減持廈門港務（3378）共2575萬股，每股作價2.072-2.102元，套現5374萬元。TCI入股廈門港務每股成本約1.387元，大約有50%利潤。
黑客話，對沖基金動作難以捉摸，有時賺幾倍都唔滿足，不過市況一旦逆轉，有時蝕大本都會照沽。滙控（005）業績咁靚，在外圍造好，但淡友仍然夠膽一開市就將期指大手質低至15400，其後雖見反彈，但最終被壓至15463收市，大跌296點。
淡友噚日突然發難，未必係靠嚇，可能真係有資金正撤出港股。恒指收15602，跌209點。港股近月的升勢靠熱錢推動，熱錢一去，動力自然消失。
內地傳出快將恢復A股發行，抽水機將大力開動，聽講連QFII買A股的限制亦會放寬，估計在港的熱錢或多或少都會流出。在金融股、石油股及礦業股拖累下，H股指數大跌168點，收報6400。
淡友主要借美國加息幅度可能高於預期質低港股。黑客話，早前金管局任總已警告美國息口未必咁快見頂。
美國樓市已現泡沫，格老的接班人伯南克無必要保住呢個泡沫不破，因為就算爆咗佢亦可將責任推在格老身上，可能最佳嘅拆彈方式，就是用最快速度令泡沫爆破，因此美國加息幅度超乎市場預期，絕有可能發生。
阿虎