自從舊年初傳出港龍航空可能被股東之一嘅國泰航空食埋之後，港龍好耐冇乜大搞作，連較大型嘅推廣活動都冇，華華差啲以為港龍已經變成沉默的羔羊，等人發落。
好彩，港龍只係沉着應戰，做HiddenDragon。最近佢靜雞雞與星展銀行傾合作，噚日正式推出港龍航空VISA卡，首年發卡5萬張。港龍行政總裁許漢忠（圖中）冇咗特首董建華大公子董立均（董公子今個月返去東方海外打理家族生意）幫手，一樣咁揮灑自如。
許總裁預期港龍今年客貨運量增長超過一成，又會請多幾百名空中服務員，對全年生意胸有成竹。港龍今次同星展合作推出信用卡，畀持卡人儲積分換機票，應該有啲刺激作用。
不過，港龍絕大部份航點喺中國，憑分換機票嘅吸引力，好似唔及航點遍全球嘅航空公司噃。
李潤芳攝