三月三日嘅報紙紛紛報道，香港電台會邀請黃毓民開咪，去港台主持節目，毓民東山復出，一定轟動，係增加收聽率嘅高招，假如擺毓民做朝早「千禧年代」，點到商台唔頭痛？如果叫毓民做七點至八點嘅「自由風自由phone」，又係煞食啫。
咁啱得咁蹺，是日去陸羽飲完茶，行到史丹利街德己立街交叉點，與毓民迎頭相撞，好彩大家係男人，心口碰心口，佢唔會嗌非禮，最多俾人問：「AreyouguysBrokeback？」你知啦，午飯時分，呢條街人迫人，好容易碰到別人或畀別人碰到，見有女性在前後左右，千萬小心。
左丁山立即捉住毓民問個究竟：「到港台開咪，幾時成事？」毓民話：「嗱，我離開商台之後，現在一無所有，一無所畏，港台幾時叫我開咪做乜節目我都制。不過，我都係今日睇報紙先知道有呢件事啫噃，港台未搵我傾過。」
左丁山話：「反對聲音好多啫，《南華早報》問劉江華意見，劉江華話港台搵一個成日反對（opposes）政府嘅節目主持人做節目，係Unthinkable（不可思議），你點睇？」毓民立刻有反應：「呢個政府唔准人反對㗎？政策唔畀得人批評㗎？做議員係做橡膠圖章呀？劉江華講Unthinkable露了底，香港電台前途堪虞。」
老馬有火，不減當年，睇吓朱培慶係唔係真正夠膽搵毓民先。左丁山有條計畀廣播處長，不如搵毓民在港台二台開節目，星期日晚上十時或早上八時之類，叫佢講歷史故事，或者講都市情懷，甚至講世界盃前瞻，咁就會降低毓民嘅殺傷性。劉江華怕且都會認為thinkable，仁慈啲，放港台一馬。
諗深層，搵邊個拍住毓民做節目呢？毓民周時一個人打晒全場，拍檔可以一句聲都出唔到。記得好耐以前毓民與張玿于曾一齊做過節目，效果唔錯。朱處長，畀條橋你，免費嘅。