豬朋甲：「入葵涌工廠區食懷石料理？咪玩啦！」企圖踩停我出發，「仲要每客$250？唔慌好食諗清楚喎。」狗友乙補多句語重心長的掃興說話。幸好，喜歡冒險的不止我一個，找到識飲識食的同道中人陳任（Joe）齊往試食，試畢，他總結：「雖然唔算正宗，但絕對唔係渾水摸魚，食到嘅絕對係頂級貨，$250呢個價錢好抵。」
記者：陳慧茵
攝影：何家亮
模特兒：Va、Lion（Salvador）
服裝提供：美麗人生（27891303）
菜式師傅親自設計
「加藤日本料理」隱身葵涌工業區，京都人加藤師傅是名廚本橋紀一郎徒弟，曾在日本及美國的「威爾頓酒店」日本餐廳任總廚：「呢度午飯時間人流比銅鑼灣同旺區人更多，夜晚又有好多人專程入嚟食飯，租金平成本低啲，食物質素就可以保持到。」這裏食物豐儉由人，百多元至近二萬元一餐都有得食，最吸引的是旬彩譜懷石料理，平日動輒過千的懷石料理，今日降價至每位$250，食的同樣是師傅親自設計、不時不吃的精緻菜式。
揀靚貨引食客
除懷石料理，店子隔天便有新鮮刺身到港，貨源搜羅自北海道、九州，最抵吃是壽司拼盤，平均價每件不用$5，陳任試過話：「肯定唔係平價貨。」加藤解釋：「以吞拿魚為例，出面好多舖都用菲律賓貨，百幾蚊斤無味，我就揀最靚嘅日本岩平縣吞拿魚腩，價錢貴10倍，蝕住嚟做因為希望吸引更多食客，再幫襯試埋其他菜式。」
壽司拼盤$35/8件
自選8件壽司，款式包括大路三文魚、赤貝、墨魚、北寄貝、鰻魚等，推介足有中指大的甜蝦壽司，味道鮮甜口感嫩滑，每件不用$5，抵食得無話可說。
活締壽司拼盤$99/5件
自選壽司款式包括碎京葱拖羅、海膽、鵝肝、松葉蟹腳等，連少見的高鰺魚也可嚐到，Joe：「拖羅入口無筋好Creamy；高鰺魚真正入口即溶，平均廿蚊件唔使抵到爛。」
甚麼是懷石料理？
懷石料理（Kaiseki-ryori）一詞源自「懷中抱石」，話說從前日本禪僧空腹修行，為止飢餓感遂抱暖石入懷暖胃，其後演變成喫茶時的小巧食物，即「茶懷石」，這種吃小巧食物的文化最後發展出9至12道菜的懷石料理，菜式由師傅設計，原則是不時不食、保留食材原味、講究環境及食物賣相，每席懷石料理理論上有先付、前菜、汁、向付、燒物、盛、揚物、酢物、食事、甘味及甜食，味道由淡至濃，吃一頓往往花上4-5小時。Joe試後有感：「雖然無傳統懷石料理10幾道菜咁完整，但食得出全部係頂級貨，呢度嘅懷石料理份量夠大味道夠濃，好啱香港人食。」
旬彩譜懷石料理$250/位（2人起）
a.（前菜）辣汁雙色吞拿魚
醋、豉油、芝麻加蛋調配酸甜醬汁，拌以口感截然不同的吞拿魚及魷魚，面層灑上京葱碎，Joe：「腍身吞拿魚配黏口煙韌嘅魷魚，口感好夾忍唔住食多啖。」
b.（燒物）福喜燒白貝
每位1隻，芝麻、京都麵豉及清酒煮北海道白貝，肉質豐腴鮮味突出，師傅特意在白貝殼上鋪上紅及白色的海鹽，寄語祝福。Joe：「汁料夠特別，香濃芝麻味好正，記得飲埋殼裏面啲汁。」
c.（食事）信州蕎小鍋（2人份）
滑溜日本蕎麥麵味濃甘香，配料有四季豆、甘笋、洋葱，牛油果與白鱔。白鱔蘸天婦羅炸漿炸脆後，口感更有層次，記得趁熱食，免泡湯太久影響口感。
d.（向付）貴の刺身
遵從不時不吃的原則，當造深海鰤魚肥美帶魚脂香、由靜岡燒津市來貨的拖羅出名鮮甜、北海道鱈場蟹蟹膏濃郁，Joe：「拖羅入口即溶好Creamy，呢度啲蟹膏夠鮮味。」
e.（揚物）季節天婦羅
山薯包裹海膽，內層夾紫菜，入口酥軟，香而不膩，來自北海道的帶子混入芝士同炸，伴以鮮嫩蘆笋同吃，口感清新。
f.（甜食）宇治淡雪羹
自製綠茶糕及大菜糕，面層鋪上大大粒日本紅豆，大菜糕入口彈牙，綠茶糕味淡帶清香，作為整道晚宴最後一款料理，正好讓味蕾得以紓緩。
食客有Say
加藤日本料理（24806668）
地址：葵涌石文徑1號
營業時間：12:00nn-3:30am，6:00pm-11:30pm
座位：90個
