好多大公司都會租屋畀員工做宿舍，不過有資格享受呢種福利嘅，多數係高層要員，而且租親都係月租幾萬蚊甚至十幾萬嘅豪宅。
呢種福利近排吹到荃灣工業區，仲帶旺咗喺工廈附近嘅細價樓，樂悠居就頻頻租出單位。
單喺上個月就有十二宗，包括一間電訊公司一次過租咗兩個單位，畀兩個嚟自台灣嘅技術員做宿舍，雖然唔係貴重豪宅，不過返工就腳，對人生路不熟嘅台灣技術員嚟講，仲好過畀幢豪宅佢住。
其中一個單位係中層十號室，約六百呎，月租六千八，每呎約十一蚊；業主○四年底以二百四十萬買入，回報率三厘四。
公司咁體貼員工，值得一讚，樂悠居單位唔憂租，啲業主就更加開心。𠵱家屋苑放租盤超過百四個，叫價每呎十四蚊。