呢排食乜都話有傳染病，所以有好多師奶friend都話唔知買咩餸，我就話呢個時候，當然係買橙啦！不過話時話，雖然一年四季都有橙賣，但唔係個個師奶都識揀靚貨（尤其係啲𡃁妹仔）。
半腍身最多汁
橙皮一定要夠光澤，摸上去要夠滑！唔好以為大就係靚，個橙夠大隻，不過輕飄飄就唔得喇！橙靚嘅基本條件係要墜手，㩒落去唔好太硬（代表厚皮），要半腍身（太腍代表過熟）。如果橙身夠圓，顏色紅紅哋，個底度尖尖哋似石榴，咁就有買趁手，靚橙就係咁㗎喇！
反而有啲橙嗰面凹凸不平，表面仲有啲褐色似裂紋嘅圖案就即係代表唔靚，千祈咪揀呀！橙有豐富嘅維他命C，營養價值高，可以減低感冒嘅機會，呢排流感咁流行，日日食包無衰啦！
橙汁溝鴨肉彈牙
其實橙除咗可以當生果食之外，仲可以煮餸，整金沙骨就夠晒入味香噴噴啦！有營養又易入口，屋企人包無投訴。橙用嚟煮鴨一樣惹味，法國餐廳最興攞橙嚟整鴨胸㗎喇！都好好食㗎，啲橙汁溝埋鴨肉，零舍彈牙，不過我鍾意橙肉撈埋啲鴨肉做沙律，凍食一樣咁滋味！