電影《斷背山》感染力跨越地域，有本地同志深受感動，婚後才發現自己喜愛同性的Peter，步出戲院的一刻感同身受：「套片似講緊我一生。」Peter的台灣男友像戲中男角般，每年不計路遠飛來港短敍，奈何妻子得悉真相嚷着要離婚，他只好放下這段「斷背山」之戀。
太太接納性取向
三十五歲的Peter每晚回家陪太太吃飯，生活安好，數天前無聊走進戲院，情緒卻不能平復：「我唔知《斷背山》係講已婚同志。」當銀幕上太太驚見丈夫與男性親嘴時，他想起自己太太早前從一手機短訊揭發他與台灣男友戀情的憤怒：「佢話要離婚。」
Peter說，李安刻畫的同志情絲絲入扣：「我係鍾意太太先結婚，但後來先發現自己鍾意男人。」他後來認識一台灣男友，但Peter不想違背婚書承諾：「好似套戲咁，都係佢飛嚟香港探我，我只去過台灣一次。」陽明山景色不遜於斷背山，但兩段異地同志情最終同樣沒結果：「台灣男友話每次見到我同老婆傾電話好冧嘅樣，覺得好辛苦。」
「時代唔同，我嘅結局都唔同。」他說太太終接納其性取向，只希望他不拈花惹草：「佢愛我，我都愛佢，雖然知道冇可能抑壓性慾，但都應承佢。」至於是否仍愛台灣男友，他苦笑：「我唔會離開老婆，唉，我都知自己要落地獄，但希望唔好落咁低層啦。」
性權會主席邵國華說，《斷》片令公眾有機會接觸同性戀者真實一面，亦令同志跳出衣櫃大膽去愛。
記者：翁煜雄