串燒成交係代理最夢寐以求嘅交易，因為一次過促成兩單甚至以上嘅買賣，收佣就認真肥仔嘞。薄扶林碧瑤灣剛剛就有單串燒成交，一個老街坊業主，因為仔女成家立室紛紛搬走，自己唔使住咁大間屋，想換番個細單位，喺代理安排下，810萬沽出27座中層1535呎D單位，跟手再用520萬買番同屋苑20座一個1020呎中層A室，套現近三百萬都有排使嘞。
兩個單位夾埋1330萬，若果可以收足佣就有二十幾萬嘞。
呢單串燒成交係由中原碧瑤灣分行促成，佢哋梗係開心啦，所以即刻報料畀蘭西知，費事行家當係自己料講通街。原來唔止咁，中記另外仲做到21座低層連平台單位成交，1520呎，作價753萬。呢三單買賣，買家全部都係區內換樓客。