大市牛皮，恒指在幾十點內窄幅上落，中資股亦無大變動，恒指收15811，升9點，H指收6568，升23點。期指跌14點，收15759，低水52點，主要係反映滙控（005）除息嘅因素。
滙控派成績表，05（12月年結）賺150億美元，升17%，比市場預估數字為佳，對滙控股價同大市會有支持。不過，由於未來一兩個禮拜會有好多隻滙控輪到期，發行商要做工夫，相信滙控唔會叻得出樣。
早輪推介過嘅股票，噚日走勢出現突破，可以翻「啅」。先講鞍鋼（347），收6.55元，升0.25元，升幅3.9%，上月底話買時係6.35元，今次破位，上升目標係7.60元。基金睇好鞍鋼，有佢哋護航，好穩陣。
至於1月底推介嘅五礦資源（1208），當時股價2.275元，噚日最高2.65元，收2.60元，升4%。呢兩三日，資源股全部發力，五礦上禮拜升上2.50元後，在250日線（2.493元）水平整固幾日，噚日再發力，拋離250日線，確認大升浪開展，照度上去，短線目標2.95元。
五礦傳快有併購行動
五礦嘅母公司中國五礦，係內地有色金屬及礦產龍頭企業之一，五礦係佢嘅鋁業上市旗艦，消息話好快會再有注資同併購嘅行動。中國鋁業（2600）呢輪升咗好多，五礦05年（12月年結）預期PE約6倍，同中鋁預期近10倍比較，真係好抵買。
新世界中國（917）足足在3.25元至3.75元整固成3個月，形成一個大型上升三角形，噚日終現突破，高收3.70元，成交1763萬股，大增6倍，同時拋離10日、20日同50日線，長期整固完成後破位而上，升幅可以好誇張，照度上去，上升目標係4.50元。同其他內地地產股相比，新中明顯大落後，今次應該可以追番貼。
新中有投資物業將近1400萬平方呎，下禮拜三宣布06年度（6月年結）嘅中期業績，若有重估增值，條數會好可觀。新中現時土儲有1.7億平方呎，係內地「大地主」，上年度結算每股資產值6.18元，股價折讓40%。以新中土儲計，只要每方呎升值20元，每股已可增值0.90元；若分拆REITs上市，股價折讓會大為收窄。
郭兆誠