做咗太古洋行大班同國泰航空主席一年就頂唔順嘅唐寶麟（DavidTurnbull），嫌冇實際嘢做而喊住要走。佢離職才一個月，話咁快就重出江湖。華華八到唐寶麟嘅去向，佢唔係過檔其他航空公司，而係去咗一間叫做AllcoFinanceAsiaLimited寶號嘅公司。
今年50歲嘅唐寶麟唔係臨老轉行去財務公司做，呢間Allco係一間有27年歷史嘅澳洲公司，有好多瓣數，包括資產管理同融資，其中一瓣係資產融資，專門出租飛機畀航空公司，客仔包括澳洲航空、新西蘭航空、英國航空、阿聯酋航空同韓亞航空。
航空公司買架新飛機閒閒哋都要一兩億美金，平時都要諗過度過，何況近年油價升到唔捨得跌番落嚟，航空公司要擴充機隊，可能會選擇租機，或者利用售後再租回嘅方法，比較化算，盤數亦靈活啲。
加上廉價航空正喺區內崛起，佢哋多數租機，唐寶麟過檔Allco唔愁冇嘢做。最重要係，唐寶麟喺國泰做咗十幾年高層，應該可以幫兩間公司Lineup啲生意啩。咁啱國泰明日開記者會公布業績，華華一定會乘機八吓兩間公司有無合作嘅可能，到時再報畀大家知。
李華華
讀者如有任何意見或報料，歡迎發送電郵至[email protected]。