呢排啲枸杞都幾靚，不過揀靚嘅枸杞都有學問㗎！菜梗愈粗壯愈好，菜梗粗壯菜味先會濃㗎，至於菜葉要濃密，而且深綠色嘅為之最好。
莖部可放湯飲
枸杞味苦澀帶甘，一般只會攞佢嘅葉菜食用。枸杞多用嚟煮湯，又可以明目，除菜葉外，枸杞骨（即枸杞莖部）可同時放鍋煮湯飲，可以吸收箇中精華。加啲豬肝、瘦肉一齊煮，就更加甘香美味。
枸杞果實係杞子
𠵱家啲阿太工作都好忙，日頭返工夜晚煮飯，經常口苦口乾，眼睛又出現紅筋，用枸杞菜煲湯飲就最啱喇！城市人正餐肉類食得多，太過肥膩，可能會患上脂肪肝同膽石，中醫話多食枸杞菜有助防治、消除脂肪肝，抑制脂肪喺肝細胞內沉積，更可以促進肝細胞嘅新生，對膽囊、食道有抗痙攣止痛功用㗎！
順帶一提，枸杞嘅紅色果實，曬乾之後就變成我哋經常食用嘅杞子㗎，經常用杞子、淮山藥、北芪、黨參、龍眼肉配搭瘦豬肉慢火煲湯，有滋腎、潤肺、補肝同明目作用，作為日常保健湯水都唔錯㗎。