噚日南區一連錄得兩宗大額成交，造價雖然都係四千幾萬，由於入貨時間唔同，一個大賺，有千幾萬落袋，另一個就蝕成百萬狼狽離場；呢個市，有人快樂有人愁。
講番兩個盤，由專門做deal嘅鍾楚義間上市公司資本策略持有嘅淺水灣璧池單號屋，約三千呎，四千二百萬賣出，呎價萬四；間屋喺零二年以二千八百五十萬買入，賺逾千三萬；呢間公司，小小超都係股東。
至於蝕賣嗰間係赤柱富豪海灣A型屋，四千二百呎，成交價四千四百萬，每呎一萬零五百，業主係擅長炒商舖嘅鄺太，佢喺零四年一共以八千幾萬買入兩間富豪海灣，其中B型屋喺個零月前蝕賣轉手，成為富豪海灣首宗蝕讓個案，另一間A型屋，撐多個零月，都係蝕賣收場。間屋買入價四千三百萬，表面雖有賺，但計埋使費蝕一百萬。