近日二、三線股炒作活動接二連三，好似早前經紀陳曾推介，話轉搞太陽能業務兼且即將改名的御泰國際（155），近排股價愈升愈有，成交仲愈嚟愈大，由於隻股升得急，市場揣測隨時會有抽水行動。
御泰昨日再升10.23％，收0.485元，係52周高位，成交股數高達7970萬股，金額3780萬元。雖然話就話御泰國際嘅太陽能業務有概念可炒，但現時仲未有錢賺，公司市值已經去到12億銀咁多，真係好誇張。
除咗御泰國際外，早排無端白事炒過一輪嘅駿新集團（091），據講又話想轉型，可能會參與大陸的燃氣業務。
駿新近幾年業務認真平平，兼夾冇咩錢賺，搞搞新思意都係時候啦。經紀陳話，其實駿新早排無端端炒上去0.34元都係為咗呢個消息，但傾傾吓又停咗冇件事，股價先至回番落嚟，但最近又話有新進展。
駿新昨升1.85％，收0.275元。雖然駿新向來有人護航，但暫時鑊氣仍唔多夠，最好睇定啲。
慕容小初