無論做乜，有強大嘅人脈關係網（千絲萬縷就更好），已經成功咗大半；點解咁講？睇吓噚日港大MBA課程同紐約哥倫比亞商學院簽約個記者會，就會明白！
個記招屬於香港總商會論壇環節之一，總商會主席鄭維志（圖左），同時係港大校務委員會（即係有份建議醫學院改名李嘉誠嗰個會）成員，而代表港大簽約嘅副校長王于漸，就係新地獨立非執行董事，至於到賀嘅新地老二郭炳江（圖右），又身兼港大經濟及工商管理學院理事會主席，你話係咪識得人多好辦事呢！
郭炳江喺業績會上，都講過對勾地嘅睇法，噚日佢又同華華講，如果勾地政策可以再靈活啲咁就好喇！佢話，港九嘅住宅地皮唔係好夠，尤其喺九龍，西九之外只得將軍澳，啟德又未批，應該放多啲市區住宅地入表內，大中小都得，畀多啲選擇地產商，邊個鍾意勾就勾囉！
程志遠攝